نه غريبدير بيزيم اؤلكه؟!

سينه داغلي!

آغيز باغلي !

آرزيلاري چن بوياقلي!

هر بير زادي بؤلگه – بؤلگه!

نه غريبدير بيزيم اؤلكه؟!

دويماياراق آل گونشين ساچلاريني آخشام چاغي -

گؤزله ييريك –

بوز آتيني يه حه رله يه ، ائليميزين ايلك اوشاغي !

او ايل لردن قالان كؤلگه،

بير گون-

اصلان اولا بلكه !!!

نه غريبدير بيزيم اؤلكه!!!

آخشام چاغیدی، گؤی بزک لری  بیر ـ بیر گؤزه گؤرونوردولر و من یئنه ده سئودا یولونون یولچوسویودوم بیر آن دیکسینیب اؤزومه گلدیم سنین آددیملارینین سسی گلیردی باشیمی قووزاییب اویان ـ بویانا باخدیم یالنیش دوشونمه میشدیم، سن اوزاخدان گلیردین سس سیز ـ سمیرسیز و من سنین گؤروشونون هوسیله اوچوردوم

آه  ... سنه فیکیرله شمک او قده ر شیرین گلدی منه کی بیر آن دوشوندوم منی وزله ییب کئچیب سن باشیمی دونده ریب دالدان سنی سسله دیم، دینله دیم گؤزه لیم بیر آن منه قولاخ وئریرسن آخی من او گؤزلرینین وورغونویام، سئودا یولونون بیر گوجا یورغونویام، یالانچی بیر گولوش دوداخلاریندا اوتوردو ، گولومسه ییب سویله دین یوز کره دئمیشه م اونود منی... اونود...اونود... 

 بو سؤز سنین اوچون چوخ راحات گلدی اما منیم اوچون چوخ آغیر نئیه کی من سن ایدیم و سنی اونودان زامان بوشلوغا چاتمالیدیم. سن گئده رکن گئدیشینین ایزی قالدی، یاغیش یاغدی ایزینی ده سیلدی اما سن دویمادین کی گلیشینین ایزینی سیلمک اوچون سنین ده گوجون یئتمه ز . او گونده ن بری اویره ندیم کی سینسامدا اؤز ایچیمده ، آغلاسامدا قارانلیخدا...

گه له جك ايتسه ده باتسادا بير گون

بير كيمسه درديني بيلمه يه جكدير           

مين خه لور آغريني اوتسادا بير گون

قيفيللاندي آغزين بير آن

بو اؤتري زامان كئچدي سوزه – سوزه آستانامدان

سني مندن آلدي گئجه!!!

      ******

هي...

آيريليق درديسردي

آغيزيني باغلاديلار دينه نمه دين

كيم بو پايي بيزه وئردي؟!!!

گؤزلرينه چؤكن قورخو –

مني درده سالدي گئجه

قارانليقدا گئدن كيمي

گئتمه دئديم،...

دايانمادين.

هاراييمي دويانمادين گئتدين ندن؟!

بيليرمي سن؟

تئل لريمي يولدو گئجه

      ******

اؤتدي زامان كئچدي يازدا

يايدا پاييزلانيب كئچدي

قيش چؤكولدو قاپيميزدا

كولك قوپدو !

شاختا چالدي !

تاختالانميش قاپي ميزدا-

بارماغينين ايزي قالدي.

اومودسوزلوق پنجره سی ـ نین دالداسیندا اوتورموشدو و آرزیلارینین بیر به بیر اولمه سینه گؤز تیکمیشدی. اما هله ده اونلارین اولمه گینی اینانماییردی، هله ده ائله یه بیلمه میشدی اونلاری اوره‌گینده قویلاسین؛ غملی باخیشلاری و یاغیشلی گؤزلری گورسه دیردی یاشاییشدان یارالیدی...