بو گئجه خزرين ساحيلينده يم

آغيرحسرتيمي چئكير دالغالار

بير گمي ياناشير دويغولاريما

يئلكنين دولاييب بوكور دالغالار

    آي جوموب دنيزه باتماق ايسته يير

     بير گئجه عؤمرونو ياتماق ايسته يير

    ائله بيل ايشيغا چاتماق ايسته يير

    لاي بالاي اوستونه چؤكور دالغالار

****************

      گئجه دير يئل اسير حؤرولور ساچيم

   ايستيرم بو يئله قوشولوب قاچيم

 قورتولوش ائوينه بير يولاق آچيم

 حسرتي ساحيله تؤكور دالغالار

                        ****************                         

 ساحيلده آغلايير قيزارديقجا دان

  گونش حسرتيله قالخير اوفوقدان

         سانكي سينه سيني سؤكور دالغالار

اليمده ن ياپيشيب منه دادديريرسان تام گؤزه لليک لري، گزيريک بيرليکده هر ياني، هر بير باجاني، ياشادير وارليغين هر آن دا مني، گؤزلريمي آچيرام نه سن وارسان نه ده ايزين!!!

 شاققا چاليبان گولوره م هي... من  نه ده لي يم يالانسان آخي سن، سني من اوزوم گونلرين بير گونو تکليگيمده‌ ياراتميش ايديم.

             يوردومون قاش قاباغيندا اوجاليبسان قارووول       

     قاراجايناقلي بولوددان باج آليبسان قارووول

              سانما آرتيق يورولوب يا قوجاليبسان قارووول       

      نئيه چوخ فيکره داليبسان قارووول

  *****************

             سنه چيخديم ساوالان تک داغي قارشيمدا گؤرم     

         سنه چيخديم گونشين ساچلاريني قاشدا حؤرم

              سنه چيخديم اوره گين سيفراسيني بيرده سرم      

    ياماجوندا کؤک آتارکن گؤوه رم

             قارووول ماهنيلارين چارداغيني يخدي کولک             

     گونشين جايناغينا آلدي قه ييم سيخدي کولک

               باغچاميزدا يئتيشن آلمالاري تيخدي کولک               

   آغريدان قان قوسورو وورغون اوره ک 

***************

                ساچيما دن دوزولوبدور ديله گه ل آرخا داغيم           

  اليم الدن اوزولوبدور قيريليب قول بوداغيم

                  گونشين سون آخيشيندا چايا بنزير ياناغين              

    سنه آلقيش دئيه گلمير آياغيم

 ***************

                 گون باتيب قاش قارالارکن تپه دن آشدي گئچه           

   چاناغيندان جالانيب وارليغيما داشدي گئجه

                   يئنه غم داملالارين بير ـ بيرينه قوشدو گئجه               

      دار گونومده سئل اولوب جوشدو گئجه

چيخاراق  اؤزوموز - اؤزلوگوموزه

آرزي سي بورانلي چنلي دومانلي

قوشولدوق زيروه ده بير - بيريميزه

***********

من ايديم سن ايدين بيرده ائليميز

چئشيدلي ماهني لار چالينير ديلار

زيروه نين بويوندا چيلغين اره نلر

دوماندا ايز كيمي قالينيرديلار

***********

تئللردن اوچاراق يئني بير هاوا

ياييلدي داغلارا،ان يانا - يانا

بير اوشاق بير قوجا بير قالا سئوگي

دئديلر جان قوربان آذربايجانا

***********

زيروه دن ائنرك آز-آجيق پوزقون

سن فيكره داليردين اوجا داغ كيمي

منده اؤز ايچيمده سن دييه - دييه

يانيرديم توستوسوز بير اوجاق كيمي

**********

اينديسه يازيرام گؤزونده گؤزوم

اولمايا بير داحا گؤرمه يم سني

بو آغير غوربته نه ساياق دؤزوم

قورخورام قارانليق آلا زيروه ني

گول اوزو خالق ایچره آغ اولدو

بیزه بیر داغ-

بیر یئخیلماز دایاق اولدو

بیر الینده قلم اولدورمه گه ظالیم لری-

خنجر بیر الینده

کلمه لر غنچه وئریر سؤزلو صداقتلی دیلینده

اولدوز اوینور ...ککیلینده

بئله بیر توی گئجه سینده هانی آیدین؟!

هانی اوختای؟!

هانی بیر-بیر چالیشیب بیرله شن ائللر؟!!

هانی قانلا بویانان یئخماغا ظالیم ائوی -

شاققیلتیلی سئل لر!!

هانی بایراق اولان ال لر...؟!!!

                                            ((سحر))