نه اولدو حیاتدان کدریم شنیم

خزانا تالاندی یاشیل چمنیم

مین یئره بؤلوندو تورپاغیم منیم

نه دن آغلاماییم نه دن دئه منه!!!؟

منی دوغرادیلار بؤلدولر منی

قانلی دوداقلاردا گولدولر منی

آخیردا کیمسه سیز بیلدیلر منی

دیریلیک یاراشار دیدرگین منه!!!؟

**********

ایندی اؤز ایچیمده آلیشیرام من

آغیر گونلریمده چالیشیرام من

بوز - بوز آداملارا قاریشیرام من

گؤزلریم دوتولوب دوشموشم چنه!

**********

آنجاق بیر گئجه دن گله جه یم من

سحرین قوینیندا گوله جه یم من

اؤلسم وطنیمده اؤله جه یم من

((کیمسه آغلاماسین اؤلنده منه))

**********

بورادا سؤیله دیم دردیمی سیزه

یاخیندیر او گونلر ، یاخیندیر بیزه

آراز ساحیلیندن آنا تبریزه

اومود یایاجاغام من دؤنه - دؤنه

جان قوربان ائدره ک عزیز وطنه

يئنه ده آيريليق دوشدو ياديما                سئخيلدي اوره گيم دولدو اوره گيم

شعير باغچاسينا يول آچا - آچا             ال آتدي ساچيني يولدو اوره گيم

چيرپيندي كامانچا قيريلدي تئللر           خييالي بورودو قاپ - قارا يئللر          

اولمايا ساراني آپاردي سئللر               آرازين فئلينه دالدي اوره گي                

                                 **********

يازييا بند اولان كلمه لر هاني ؟          هاني دالغالانان بابكين قاني ؟

ندنسه چن دوتوب آذربايجاني ؟           بو گئجه قيدينه قالدي اوره گيم

                                 **********

اينديسه دييرم قارداشيم، باجيم             منيم وارليغيمدير باشيمدا تاجيم

قار ياغيب باشيما آغاريب ساچيم          سانما كي پاييني آلدي اوره گيم 

بير ايچيم چاخير ايدين -

گؤزومون چاناغيندا!

كئفلنديم ايچه - ايچه !!                               

قورتولوش وارليغيمي بورودو-

قورتولدوم سنين كيمي.

داحا... نه سن واريدين ، نه ده من

بيز تگجه بير داملاجيقلا يووولدوق-

مورگولو ياشاييشدان

من ، سن ‌، او ، بيز -

بوروم-بوروم یوللار گئتدیک آنا تبریز...

...چوخلو یئرده گؤرسه نیردی شعر اوجاغی

اوجاقلاردا ائلیمیزین دوشونجه سی

آزادلیغین گؤی نفسی

و...

دومانلی بیر هاوادا یاییلیردی

( قوردون ) سسی ...

آی سیز گئجه!

های سیز گئجه!

آراییردی اولدوزلاری بیلمه م نئجه - بیلمه م نئجه؟!!!

آخيلان اولدوز!!

قاداقلي قاپي نين ياشلي گؤزونده-

آغ-آپباغ آي جامي قارالان زامان-

بير آغير يوخونون ياستيغين ديير!!!

باخیشین آیدیندیر گوزلرین چن سیز

سوزلرین نه دییر ((من))یمه من سیز

یاشاماق چتیندیر سن سیز وطن سیز

                                                      کونلومو تالایار بیر آخشام سئزئ

                                                      آذربایجانیمین قهرمان قیزئ

یاشیل لیق یاییرام چولده چمنده

یازدا به نوشه نی درنده منده

سنین اللرینله دوشسم کمنده

                                                     ارییه ر داغلارین قارلارئ بوزئ

                                                     آذربایجانیمین قهرمان قیزئ

الینی الیمدن قوپارما هه له

چئلغین اوره گیمیز بلکه دینجه له

قوربه تدن قاییدان دورنالار گه له

                                                     چالینا آتامین قوپوزو سازئ

                                                     آذربایجانیمین قهرمان قیزئ

گه له جه گه دوغرو ايشيغا دوغرو

گه له جه ك-

 منيم دير-منيم دير-منيم

گه له جه ك اولاجاق ظولمه ته غه نيم

سن منیم اوچون دالغا - فیرتینا - ده نیز - دویغو - شیمشک - گؤیله رین دان اولدوزو و قارانلیق دا سؤنمز بیر ایشیق ایدین ، بویله یاشایان اینسان اولرمی؟!

ایندی یانیرام آتا ، یانیرام نئیه کی هئچ زامان سنین گؤزلرینه دیک باخا بیلمه دیم آما سنی گؤردوم اولومون گؤزینه دیک باخاندا ، او آن اولوم ده سنین قارشیندا دیز چؤکدو و من سوسدوم نئیه کی بیلمه دیم آغلاییم یوخسا

گولومسه ییب گووهنیم. هئچ زادی بیلمه دیم تکجه بونو بیلدیم کی سن سیز نه گولوشوم گولوش اولاجاخ و نه آغلاماغیم آغلاماخ.

ایندی ایسه گونلر بیر - بیرینین آردیجا گئچیر و من یورولمادان یئنه ده سنی گؤزلیره م ، یانیمدا اولماساندا ، هئچ بیر زامان گلمه سنده یاشاییرسان رویامدا - کونلومده - گؤزلریمده و بوتون وارلیغیمدا