| تبليغات | X |
|
دومانلي گونلر
|
دورنالاردا كؤچون چاتيب
دومانا بورونوب (خان پري) ده چينار آغاجلاري
سن يوخسان،
پاييزلايير گؤزوياشلي كوچه لرده به نؤوشه لي بارماقلاريم
شه وه ساچلاريندا يئل اسير
بو شه هه رين-
قوشمالاريندا بير دنيز قيزي ته له سير
سن يوخسان
يوخسان
يوخسان!!!
سن مني یاشاتدین، من به نؤوشه ني
کيم گؤروب آغلادا سئوه ن سئو ه ني؟
من سني دويماديم باغيشلا مني
بونلار اوره ييمين چارداغين يئخير
هر نه دن يازيرام سؤزوم داريخير
دون گئجه ده نيزي - ده نيزه قاتديق
ياتان دويغولاري بيردن اوياتديق
سئوگي هارا چاتدي، بيز هارا چاتديق؟!!!
باخ ، منيم اوستومه ائلديريم شاخير
هر نه دن يازيرام سؤزوم داريخير
گئديرم قارق اولام دوماندا - چن ده
ماهني منده سولوب ، سئوگي ده سنده
قيناما به نؤوشه بنده دوشنده-
بير که ده ر سينه مي يانديريب ياخير
هر نه دن يازيرام سؤزوم داريخير
داريخير يازيلار- داريخير اليم
بيچيلير بوغازيم باغلانير ديليم
بيلميره م ياشاييم - بيلميرم اؤلوم
قيريق قافييه لر بئينيمي سيخير
هر نه دن يازيرام سؤزوم داريخير
گؤر نئجه لحظه دي، گؤر نئجه آن دئ
بير « پري » دنيزده اود دوتوب ياندئ
اؤزونده بوغولما «خزر» آماندئ
ساحیل اوز چئویریب ساحیله باخیر
هر نه دن يازيرام سؤزوم داريخير
توكه ندي اومودوم قيريلدي هئييم
دؤرد دووار ايچينده يانديم آليشديم
هايانا اوز قويوم - هاياندان دئيم
*****
اولمايا قار ياغيب يولونو كسدي؟!
اولمايا گه لنده دومانا دوشدون؟!
ديليمده آجي بير قوشما ته له سدي
بلكه ده سارسيليب گومانا دوشدون
*****
بو گئجه لحظه لر ايلله شير منه
قاريشير شعريمين قاراسي ، آغي
ماوي لر قاراليب زيلله شير منه
گه زيره م آردينجا ، آراني ، داغي
*****
بو گئجه نه يامان اوزون گئجه دير؟!!!
گؤزومده يول آزير،ياتا بيلميرم
سيخير اوره گيمي هيچقيريقلاريم
اؤزومده - اؤزومه چاتا بيلميرم
*****
يوخودان آل مني ، آپار دنيزه
سنه قوربان اولوم آي دنيز قيزي
آي گيريب بولودا ، كيم باخير بيزه
سسيمه ، سس وئر ا...ي گؤيون اولدوزو
*****
يولونو گؤزله ديم گه لمه دين نه دن؟
داريخدي شعيريم،داريخدي سؤزوم
آي دا يورقون اولوب آخير زيروه دن
نه اوندا دؤزوم وار نه منده دؤزوم
آخشامين سون پرده سينده-
قانا باتميش حؤروگونون قورد آغزيلادارانماسين!!
كورا يولدا قالان،گؤزلر،
هاچاناجان دييه جكلر ناغيللاردا-
نازلي قيزيم...
هاچاناجان-
دييه جكلر!!!
ياريسي قيرميزئ، ياريسي سارئ
كؤكسونه قالاييب هئيوانئ، نارئ
او سئوه بيلمه دي آلماليقلارئ
قووزاندئ داغلارا ، قوشولدو يئله
آغلاما ببه ييم آغلاما هه له
***
دئيرلر ياريسي توش گه ليب قارا
ياريسي قارق اولوب قارانليقلارا
آلما باغي هارا ...؟ او يئرلر هارا؟!!!
« خزر» اللرينده گه لير ساحيله
آغلاما ببه ييم آغلاما هه له
***
آلما مي اليمدن روزگار آلمادي
داش آتديم آلمايا، آلما قالمادي
او واختدان هئچ آلما داي سارالمادي
بيزيمده يازيميز يازيلميش بئله
آغلاما ببه ييم آغلاما هه له
***
گونه شه آند ايچيب اؤلمه يه جكدير
گه لين ده چيخاندا ، گولمه يه جكدير
بير كيمسه درديني بيلمه يه جكدير
ماهنئ قوجاغيندا گه له جك ديله
آغلاما ببه ييم آغلاما هه له
***
بو آغئ سوووشار آغلاما گولوم
آلمادا گول آچار، سارئ بولبولوم
گؤزونون ياشيني من نه جورسيليم؟
آخئ قافييه ني وئرميشم سئله
آغلاما ببه ييم آغلاما هه له
يازين اته گينده سولان گوللريم
منه ياردئم ائدين لال بولبول لريم
ساچيما دن دوشوب عزيز ائللريم !!!
مني قارقيش ائديب باغچالار باغلار
«بوگون سئوگيليمين تويودو داغلار»
******
لحظه لر آوارا ، منده آوارا
سينه مه اود دوشوب، اوره گيم يارا
بير ائلچي يوللاديم يارا يالوارا
آليشدئ ايچيمده قارالار، آغلار
«بوگون سئوگيليمين تويو دو داغلار»
******
داغ چئكيب سينه مه دؤزه بيلميرم
زينه سيز بولاغام ، سوزه بيلميرم
من اوندان اليمي، اوزه بيلميرم
سئوگی نامازیمدا بیر اوزان آغلار
«بوگون سئوگيليمين تويو دو داغلار»
******
يول وئرين گئديرم بويونا باخام
اونو سئومه يه ني يانديريب ياخام
بير داملا ياش اولوب گوزيندن آخام
گؤز یاشیم سئل اولوب يولومو باغلار
«بوگون سئوگيليمين تويو دو داغلار»
من دویا بیلمه دیم نه اولدو بیزه
سندن آیریلالی گوله بیلمیرم
گئری دؤن منی ده آپار دنیزه
قورتولوب یانینا گه له بیلمیرم
سینیق اوره گیمده سنین حسرتین
داغ کیمی چئکیلیب داغ کیمی قالیب
بلکه ده دؤنمه گه یوخ جسارتین
بلکه ده بوداغلار آیریلیق سالیب؟!!
*****
گئری دؤن بیر اته ک اومودوم قالدی
دئدیم وارلیغیمیز سولماسین داها
گه لمه دین ، آرزیلار سولدو سارالدی
سن سیز یاشاماغیم قالیب آللاها
یادیندا بیر گئجه قول بویون اولدوق
سنین گؤزلرینده بوغولدوم بیر آن!!!
نه ده نسه بئله جه سارالدیق سولدوق
او سئنیق کؤرپوده آیریلان زامان
*****
ال – اله ، اوز – اوزه دایاندیق دوردوق
« آی » دا خومار – خومار باخیردی بیزه
کؤرپونون اوستونده بیر نیشان قوردوق
آیریلدیق ، سؤز وئردیک بیر بیریمیزه
*****
سن باتدین دنیزه بیر دنیز کیمی
سندن آیریلالی گوله بیلمیرم
من سئنیق کؤرپوده قالان ایز کیمی
قورتولوب یانینا گه له بیلمیرم
منیم باشیم آغاریبدیر
یازلیغیما دولو یاغدئ!
ایندی منی مندن آلان
اوره گیمده چؤکن داغدئ
نلر چئکیب منیم باشیم
آغاریبدیر ساچیم ، قاشیم
اینانیرام ، قان قارداشیم
اؤلمه ییبدیر هله ساغدئ
من آغلادیم اودا گولدو
آیریلمیشیق نئچه ایلدی
هئچ بیلمیره م نه نیسگیلدی!!
نه آغریدی نه سایاغدئ!!
آرزیلاریم یورولمایین
اوز ـ گؤزومه سوورولمایین
یانیب – یانیب قوورولمایین
سئوگیلیمه یئته ن چاغدئ
هاوا سویوق گئجه یاری
ایسته میرم یاغان قاری
آداملارین آرزیلاری
یاری قارا یاری آغدئ
سیزه بیر سئنیردان یازیرام
قارشیمدا ، توپراق ، آنام
آنام اوزو توپراق اوسته !
سیلاحلارا قارشی گولور کؤرپه جیگیم!!
باریت قوخوسو گه لیر اوتایدان
آج دئیلم ، سوسوزدا ...
ماویلیگیمی چولقایان دحشت-
اؤنومده دالغالانیر
آنام گول له له نیب !
به به گیم یانیر !!!
توپراغیمدا قان قوسور آچیلان به نؤوشه لر!!
بیر سئنیردان یازیرام سیزه
بو تایدا من
او تایدا ، یاریم یاریمچیلیق
او شعر یازیر
من ده
او درددن
من حسرتددن
آرامیزدا بیر آددیم آیریلیق کؤلگه له نیر!
آنام
توپراغیم
به به گیم
گول له له نیر !!!
آچيق قوللاريندا يئريم هاردادير ؟
نه دنسه سيغميرام قوينينا سنين
منده ايسته ييرم بير مينجيق كيمي
دولاشيب آسيلام بوينينا سنين
قيما گؤزلريندن ايراغا دوشه م
يئر ائله شاختادير اوشويور جانيم
منده دوداغيندا قالان اؤپوشه م
« آي » بونا شاهيددير من نه جور دانيم
سنه يالواريرام سون باهاردا من
سيخيلير اوره ييم سيخيلير آنجاق
قارانليق گئجه لر سيزلايان كؤنول
سنين اللرينده اولوب اويونجاق
وئر منه گؤزونون قاراسين آغين
قوي سنه يئر ساليم اوره ييم اوسته
سئوه ك عشقيميزين لاپ كؤرپه چاغين
بو سئوگي يورقوندور - بو سئوگي خسته
ايزين وئر ياناشيم، گه ليم يانينا
بو گئجه ائله بيل سون گئجه ميزدير
بو گئجه قاپي دا قالان گؤزلريم
اؤزونده بوغولان قانلي دنيزدير
بو منه درد اولوب اؤلدورور مني
نه دنسه سيغميرام قوينينا سنين
منده ايسته ييرم بير مينجيق كيمي
دولاشيب آسيلام بوينينا سنين
من
قورخا-قورخا آغلادیم
دردیمی کیمسه بیلمه سین دییه-
آغ ساچلاریما بوروندوم
سن گئتدین
گونشین باغریندا-
قانلی بیر ایز آغلادی
باشینا قار یاغان ... تبریز آغلادی!!
مني ائله آتيب گئتدين
سينديم سنسيز بو شه هه رده
بوزا دؤندو دويغولاریم
دوندوم سنسيز بو شه هه رده
قار بورودو سؤزلريمي
دومان آلدي گؤزلريمي
سندن قالان ايزلريمي
دانديم سنسيز بو شه هه رده
***
اوره گيمه چئكدين داغئ
قويوب گئتدين آخشام چاغئ
داها سنسيز ياشاماغئ
قانديم سنسيز بو شه هه رده
***
گونوم اولوب گوندن قارا
هارام واردير گئديم هاره ؟!!!
يادا يالوارا-يالوارا
يانديم سنسيز بو شه هه رده
باخما اوره گيمده ديل ياراسينا
سورون گل يانيما كيم بيله جكدير؟
مورگولو حيانين زيروه سيندن آش
جالان دول جانيما كيم بيله جكدير؟
*****
قوجاقلا تام منيم ايستي جانيمي
قولونو بوينوما سال ياتاق بير آز
سريلسين اوستومه ساري ساچلارين
بو ماوي سئوينجه ، آل قاتاق بير آز
*****
من ((سني سئويرم)) سؤيله ييم سنه
سن آمما سئو مني قالما گومانا
اوره گيم چيرپينير اللريمده باخ!!
بو چيلغين اوره گي سالما گومانا
*****
گئجه لر ، نه دئيم بو يازيق منيم
سن سيز ليگ اوغوروندا گؤز ياشين الير
بوتايدان او تايا نئچه ايل دير ... هئي
*****
بو گئجه(( آي)) دا كي يوبانيب ته لس
سورون گل يانيما كيم بيله جكدير
مورگولو حيانين زيروه سيندن آش
جالان ، دول جانيما ، كيم بيله جكدير؟؟؟
داغ سنین بوینوندا !!!
نه آغیرمیش گوناهیمیز ؟!!
هاوا حيرسلي
هاوا ... توتقون !
ائله بيل داغدا بوراندير !!
شاخير هر بير يانا شيمشك ،
گؤيه باخ بير :
چاپيري يورقا آتين ائلدئريم اوغلو قارا گؤيده !!!
ائله بيل ، قار ياغاجاق!
يادا-
گؤيدن يئنه اولدوز آخاجاق !
هاوا بوم-بوز
هاوا سولقون !
هاوادا هر نمه دولقون !
اولمايا قاش قاراليبدير؟!
يا ، گونش داردا قاليبدير ؟!
سوووشاق بير بئله چاغدان
سورويورلر(( توزا باتميش گونشي)) دار كوچه لرده !
بیلمیرم نه دئیم هایاندان نئجه!!!
بوراندان گلیرم یول وئرین منه
بیر به یی گؤرموشم تویدا آغلاییر
وارلیغین ائله جه چولغاییب کده ر
سانکی سئل ساراسی چایدا آغلاییر
زیروه نین بویوندا بیر آغاج گؤردوم
باهاردا آغلاییر (یای)دا آغلاییر...
قيفيللاندي آغزين بير آن
بو اؤتري زامان كئچدي سوزه – سوزه آستانامدان
سني مندن آلدي گئجه!!!
***********************
هي...
آيريليق درديسردي...
